Gavìo mài vàrdà co che lojega vienla pianifegà l’urbanixasiòn de le sità? La sircolasiòn de le màchine, la xè l’ònego vèro fondamento. Pedòni e siclisti li vien ignorà. Pensemòse sòl còsa ca la raprexénta na rotònda pa on pedòn! E pa on siclista. Na òlta bastava traversàr la stràda, dèso te tòca fàr sentenàri de mètri in mèxo el tràfego e ciapàrte claxonà da tùti. A ndo ca na òlta se caminàva, le amininstrasiòn comunàl le inpitùra l’asfàlto de biànco co dele strìke e i dìxe ca li gà creà parcheji. No inpòrta sa no ghe xé marciapìe, le màme le ga da far le jincàne in mèxo el tràfego co le carosele e el bòcia rènto ca respira smog e magari rìscia èsar tirà sòto. I vèci co la carosèla, i toxàti, i se sàra su in càxa parchè fòra no se respìra l’ària e se finìse sòto le màchine. Ndàr a pìe no xe consumista. par còsa credìlo ca sèvita nàsar spòrt a ndo se dopàra machinàri e atrèsi o vestìti pa perdar chìli? No costelo mìa gnìnte caminàr pa stràda? Propio parche no còsta, parche fàr el pedòn no xè consumìsta, tutà l’ideolojìa economega dominànte penalìxa chi ca camìna. Far el siclista e spendar fra bisicleta e onifòrme fra 1000 e 2000 èuri a xè consumìsta, èco ca so la scàla de valòri el siclista el vien premià on fiatìn de pì del pedòn. Far sport fa bodybuilding, vèla, golf, sì, a xè gràn consumìsta. Ndàr in màchina a xè consumìsta ncòra de pì, èco parché va al podèr politeghi ca premia chi ca va in màchina, èco parché i ghe fà rotonde, parcheji pa insentivàr el tràfego co coàtro rùe. No dìgo ca ghe sìpia malaféde, ma on sistema a ndo goerna el pansièro consumìsta, le desixiòn polìteghe e tùta la filoxofìa le privilèja na vixiòn del mòndo consumìsta. On pedòn ca el mòre pa stràda no xé on problèma e no fa notìsia fa on automobilista ca el mòre de insidente, parchè : on non-consumista ca mòre no val racoànto on consumista ca mòre. Pararìa na erexìa e invése la xè la realtà de l’ideolojìa a ndo sémo tocià. Chi ca camina, chi ca va al laòro in bisicleta, el xé on pardente, el xè on portador de on modèlo anticonsumìsta. On invése ca el va al laòro co na màchina ecolojega ca costruìrla se incoina 10 olte farghene ona a conbustìbili fòsili, se finìse so la coertina dei jornàl fa na stàr Holliwoodiàna.