On sciàpo de Vèneti na sèra fra na ciàcola e st’altra, a li se gà dìto fra de lòri: ma chi ca vìve in India, in nord amerega, in Ostràlia, in tùti chei lòghi a ndò li pàrla inglexe, anca fa segòna lengoa, còsa sàli de naltri Vèneti? E la stanpa, i jornalisti foresti, le organixasiòn internasionàl e omanetarie, le intelligence militàr e ajensie de stànpa mondiàl, còsa sàli de naltri fòra ca le notìsie ca scrìve i italiàni?
In pratega da 150 àni, naltri li ne cònta i nòstri nemìghi. Ma ve lo imajinèlo co xèra Goebbels e Hitler ca li descrivea i ebrèi? Ma ve figurèlo i Turchi ca pàrla dei Armèni? Francisco Franco el descrivèa i Baschi fa dei contadìni montanari, e la stanpa italiana e tv descrivèa i Tirolixi e Sìculi o Sàrdi fa dei pastòri ignoranti. Eco la raxòn ca la ne gà fèsto vèrxar sto sìto. Volemo nararse al mòndo sènsa madiatòri.
Volemo podèr dìr sòra de naltri sensa sensure, sensa fìltri. Sèmo stràchi e no xè jùsto ca sìpia i nostri opresòri parlàr de naltri al mòndo. I Vèneti li xè bòni parlar de lori stìsi da so pòsta, da lòri sòli. Co sto sìto se inàugura na nòva èra de coltùra, a ndò i Vèneti se autodescrìve inte on sìto ca devènta na ensiclopedìa del Popolo Vèneto.
Dèso no ghe sarà pi gnisòn al mòndo ca farà la dimanda insùlsa : “Chi ca xèli sti Vèneti?”. Da ancò i italiàni li tàca perdar naltro monopòlio e naltri riapropriarse de la nostra identità e dignità.